20. September 2025
Klock 19:30 Uhr BBZ, Cafeteria
Danzhuus mit de
Möllner Folk-Kapell
De Folkclub startet na de Sommerpaus mit en Danzhuus!
De Möllner Folkband (Leitung Lorenz Stellmacher) warrt to`n Danz opspelen un Danzleiter Uwe Thomsen all Danzbegeisterte seker un routiniert de Welt vun de Folkdänz vermiddeln.
„Dat is al en ganz besünner Danzbeleevnis, wenn een to gode handmaakte Musik dat Danzbeen swingen kann.“, so de Tenor vun de Folkdänzerinnen und -dänzer, de regelmäßig kaamt. De Folkkenner Lorenz Stellmacher arrangiert de Musik passend för de Folkdänz.
„Bi disse Musik kann een denn ok gor nich anners un danzt eenfack los“, weet de Danzleiter Uwe Thomsen ut johrelange Erfohrung to berichten. Un ja, eenfack is dat tatsächlich! Denn de Schreed warrt bi langsame Musik inöövt. Dat Tempo warrt steigert, bet all so seker sünd, dat de ganze Danz dörchdanzt warrn kann. Dat gode an Folkdänz is, dat een ahn Partner/-in oder mit Frünnen in ungerade Tahl kamen kann, denn de Folkdänz warrt in verschedenste Formationen danzt. Partnerwessel innerhalb vun enen Danz sünd völlig normal, schließlich övernöhm de Folkdanz to sien Tiet de gesellschapliche Opgaav, de/den annern kennen to lehren.
Kennen lehren kann een sik ok in de Danzpausen. Meist drüppt een ok gode Bekannte un Frünnen wedder, mit de dat Spaaß maakt, bi kohle Gedränk, de in`t Danzhuus anbaden warrt, to klönen un den Alldag to vergeten. Tosamen mit de Dänz un de Live-Musik is dat en wunnerbore Kombination, mitenanner Spaaß un Freud to beleven.
Danzen maakt glücklich – un dat is bi`t Danzhuus vun den Folkclub düütlich to föhlen.
Kaamt geern vörbi un siet willkamen!
De Intritt kost 16,-€, Folkclub-Mitglieder hebbt frieen Intritt.
Kartenreservierung unter 04542 822472
↓ Hör to! ↓