Michael Jessen & Michael Ziethen

De Folkclub heet de beiden Vullblaut-Gitarristen Michael Jessen un Michael Ziethen to en Kunzert vun de Extra-Klass hartlich willkamen. Leder to`n Drömen, to`n Swingen, to`n Tohören oder blots to`n Wollföhlen: Wat disse mehr von Weltmusik, de Klassik, den Jazz, den Blues oder den Flamenco inspiriert sünd – se sünd ümmer melodiös, lies, afwesslungsriek, unverwesselbor un mit Leevde speelt.

Michael Jessen is Profimusiker dörch un dörch un in de verschedensten Stilrichtungen to Huus. Dorbi is he stark vun de Rockmusik präägt. Akustisch hett he enen herrlichen Ton un bringt ümmer överraschende Sounds un Harmonien in de Songs rin.

Michael Ziethen speelt Gitarr ut Freud an`t Instrument, so oft dat geiht. Dat Stückeschrieven kummt dorbi mehrst vun alleen. Al vör mehr as 40 Johren stünnen de beiden as instrumentalet Duo op de Bühn. „Unplugged“ weer dor noch gor nich erfunnen. Bi dissen Optritt präsentiert se ehre sülvstschrevenen Hits.

De Folkclub freut sik, disse grootortigen Gitarristen begröten to können un wünscht all Kunzertbesökers en överraschendet un eenmaliget Kunzertvergnögen!

De Intritt kost 16,-€, Folkclub-Mitglieder hebbt frieen Intritt. De Kunzertsaal un ok dat hele Gelände is Rullstohl gerecht.